UNDERLAND

作為呢廿年來都有堅持聽廣東歌既樂迷，每次聽到「樂壇已死」都反白眼。唔係話香港樂壇有幾精彩絕倫，但作為樂迷眼見都仲有好多有心只係非主流既音樂人。成日講住呢句對佢地未免太不公。而媒體成日跟住講，但推極又都係差不多類型既歌。說好的俾大眾聽到不一樣既聲音，合力打造一個百花齊放既樂壇呢？

呢十年來真係只有Viu，令我深刻感受到貢獻香港樂壇既誠意。全民造星為樂壇注入活力，平時Chill Club都俾左舞台好多歌手去cover/ plug歌，呢個頒獎禮對好多無咁主流既歌手更係一個難得既機會。

其實一開始見入圍歌曲既歌手一半都無黎，都幾驚個show會悶。但結果表演單位組組都係優秀但較少關注度既歌手，有獎無獎都盡力演出；選曲驚喜，非主流但絕對都係好歌。成晚編排、概念清晰；不論呈現出黎既效果如何，都睇得出有俾心機諗，完全見到Viu對音樂既誠意同尊重。比起頒獎禮，更似一個大型crossover音樂會，大家係黎用音樂聯誼。「人人樂壇，音樂第一」，唔係得個講字。

得獎名單更係超級大驚喜。其一在於Viu無做馬，觀眾投左就頒－－全晚最大贏家竟然係林家謙而唔係Mirror& 姜濤！其二係Serrini票數竟然高到拎女歌手銀獎！（尖叫！）作為鍾意左佢7年既歌迷，從來無諗過一直都「on9事認真做」，無厘頭但邏輯嚴謹（細思甚至有哲理）既佢可以係主流樂壇有咁既成就。除左戥梁總理開心，就真係覺得大眾接受度愈來愈高，而somehow Viu係幫左唔少。於是睇完個show，作為樂迷只有感動。學d歌手得獎時講句，多謝Viu！

最後請奉梁總理籲，齊齊愛護家him～呢個係有才華既好仔黎，唔想佢咁早退居幕後TT

最後，忍唔住要逐段表演講幾句。

林二汶 x Gin Lee x 鄭欣宜 x 泳兒 (活著Viva)

「x人x色」概念比較適合有編曲能力，個人風格強烈既音樂人。而四位都唔多係賣呢類，所以呢到就炒炒地車XD 我個人係喜歡聽佢地唱歌的，所以更覺得佢地難得同台，交出呢個表演有點浪費～希望以後仲有機會俾佢地jam歌。

岑寧兒 x 林家謙 x 陳蕾 (今天只做一件事、心照一生、Children Song、天下無雙)

睇名單已經知道會享耳福。Yoyo同豹哥絕對可排進線上聲底最好既歌手十強。係果種一出聲，我無論做緊咩都會立即停低去望下既類型（Chill Club版「盡力呼吸」好聽到喊）。家him係到就係和音之王。選曲更無野好講，side track界top之中top，每首都大愛。（雖然而家聽到陳生我仲係會心一緊）不過呢段收音古古怪怪，如果Viu可以搞搞個mixing再重新擺上youtube就好了。

黃妍 x Mischa x 洪嘉豪 x 吳林峰 x Jace Chan

呢個line up既原因，吳林峰已用一首「樂壇已死」道盡。（吳林峰同林家謙既作曲能力我覺得係新晉一批入面最閃亮。家him已被大眾留意到，希望下個係吳林峰）

樂壇新人 16個單位

一齊睇show既三個本地樂迷都以為自己已經聽得算多，估唔到仲係有咁多唔識既新人。viu真係俾左個好難得既舞台佢地。（雖然就咁聽，唔識既繼續唔識好似都無咩損失；但人生之所以仍然有趣在於意外驚喜，作為樂迷總是超級歡迎被打臉的）

陳健安 x Serrini x 林奕匡 (惡夢經、夢中人、網絡安全隱患、相逢何必曾相識、有人共鳴、凝望)

新舊交融做得如此之好。新歌真係比舊歌差嗎？呢個世代歌手比不上老歌手嗎？定只係無心留意？呢part選曲既係天才。「網絡安全隱患」出果陣，已經想聽Serrini駁埋「相逢何必曾相識」黎唱！有點可惜係難得聽到「惡夢經」live卻只有幾句，無show到呢首歌後半段精彩既編曲。（需要CAllStar演唱會please）

CAllStar x Dear Jane x Mirror x 艾粒 (銀河修理員、逾越生死、ignited、奇妙事不斷有、大飲茶)

組合互唱對方既歌，驚嚇大過驚喜XDD  DJ既歌連CAllStar都救不了～今晚最飲恨就係RB無黎，呢段好需要六號！但好surprise居然有艾粒。佢地首「奇妙事不斷有」又係好underrate。

向來熱血band底如我，竟然覺得呢段表演排今晚倒數第二。諗諗下，早幾年香港樂壇精彩既都係band，呢兩年又到返solo歌手。不過很好，呢d就係樂迷想要既百花齊放～

全晚最好笑係mean精我本人前面不斷指指點點，但阿Jer呢到都唱得一般就立即話：唱跳嘛！唔夠氣理解既！fd：佢出場有無10秒？跳左乜野？偏心會唔會太明顯？ XDDDD

但阿Jer只出左4首歌，4首都係藝術品等級；其他地方未夠好，都絕對值得俾機會佢慢慢磨練。同埋佢今晚前面明明唱得幾好，係炒呢到之嘛～（講到底就係開左濾鏡XDDD）

許廷鏗 x 小肥 x 陳柏宇 x 馮允謙

典型靚聲但悶既男歌手組合XD（馮允謙一半半啦）不過呢D concept係頒獎典禮上，總係好歡樂而且能立即引起共嗚。唔係fans都聽得好開心。