UNDERLAND

一直都好喜歡睇張敬軒同王菀之既互動，甚至為過佢兩個去睇Octave。

係Youtube上面睇過好多佢地同台既表演，都非常令人驚艷，

特別係Hins Live in Passion兩位對彈井 / 留白，極度震撼。(強烈推薦)

所以，雖然只能算半個王菀之歌迷 (甚至係EX的)，呢個演唱都不得不去啊。

一開場就黎一首Octave既合唱曲開籠雀。

雖然有意思，歌詞都好岩用作開場，但就係少左d氣勢。

幸好之後係漸入佳境，相逢何必曾相識同莫名其妙既叉燒包令大家開始high，

超爆笑小talking後就進入兩位既大熱曲。

水百合 / 留白 / 井 / 最好的 /  該死的快樂 / 迷失表參道，

迷幻搖滾系列，Ivana ROCK THE STAGE!!! 

張敬軒既選曲明顯係用黎配襯王菀之。但仍然被一首「最好的」完爆。

不過迷失表參道可算驚喜，Ivana伴舞好有架勢。

等 / 櫻花樹下 / 羅賓 / 頭髮亂了，high爆全場。

即使我更喜歡王菀之既音樂，但講控場，張敬軒點都係比較強果個。

如果頭先既迷幻搖滾系列之後，我已經可以將呢個音樂會評為中上；

接下來既小團圓 / 青春常駐 / 迷失藝術 / 笑忘書 / 末日，就可以直接宣佈今晚係經典。

無計，頭四首就係佢兩位唱過既歌中我的最愛啊。最後用末日做總結，完全神來一筆。

接下來兩位終於開始合唱，大家最期待既無厘頭部分上場XD

伴我啟航 / 低科技之歌 / 粒糖有毒 / Chotto等等 / 友誼的小船，

加埋迴轉壽司既舞台設計，再次笑到傻XD

Encore就係要黎感動你。

My Way / 我真的受傷了 / 擁抱一個人 / 手望。

四首歌，表達既係初衷，無論指既係音樂、態度定友情。

係手望既伴奏中，軒之二人相擁降下，眼淚差d湧出黎。

再聽一百次佢地既歌，應該都排唔出一張比呢場更完美既歌單同Rundown。

唯一可惜既係，睇佢兩個對彈係我一直以來既心願，

估唔到係一個專for佢兩個既演唱會都睇唔到 T_T