UNDERLAND

因為蕾子都係自己寫歌，風格十分統一
只要佢唔唱好多cover，未入場前我都預到個rundown大概係點
但作為睇過佢大大小小唔同show既歌迷，我仍然次次都抱滿期待
呢份期待與其話係俾佢既音樂，更多係俾作為歌手果邊既佢的

但我最愛佢既一點，係佢永遠都可以滿足到我一次比一次高既期待
就好似「今日的我打倒昨日的我」係一件幾容易既事咁
但其實你同我都知唔可能簡單，背後一定係非常多既努力
以前既蕾子聲線可塑性已極強，聲控都強，只係音準尚可改進
但今次既佢更穩之餘，聲線仲多左份通透感
以致佢唱安慰人心既歌果陣殺傷力更大
我晚晚都覺得我唔會喊，但晚晚都係唔同既位暴哭
尾場佢話：
「出左《念》之後我收到好多inbox，我無諗住咁多人想離開呢個世界」
之後就接《凡星》，我現場喊完，返到屋企又喊左半個鐘

可能因為陳蕾係以親身經歷入筆，佢既歌詞無咁堆砌，反而更貼地
呢種我地日常無法言說既憂思有人替你唱出黎果陣係更入心
亦令我深深覺得迷失可能未必係壞事
例如蕾子將佢既迷失入歌，安慰左千千萬萬個同路人
尾場有人大叫多謝陳蕾之後佢喊左
我只想講，我唔識寫歌，但我永遠相信音樂既力量
而陳蕾絕對擔得起一句多謝

呢幾晚真係好多謝你