一個小故事送俾49歲既大細路，祝佢生日快樂。
故事嘅開頭很老土：
「從前有一個小女孩，細膽自卑，唔識同人溝通；不至於受欺負，但都總係孤伶伶一個。
喺一個十一分平庸嘅日子，小女孩照樣一個人返學，一個人食飯，一個人放學，一個人瞓覺。
要講呢晚有咩特別，可能係特別悶熱。空氣彷彿被凝固咗，所有聲音都傳不到耳膜。
太熱了。小女孩從睡夢中醒來。周圍安靜到令人有點害怕。
喺一片死寂之中，有個奇怪既磨擦聲衝破屏障，帶領小女孩去到屋外嘅花園。只見有兩個氣球，一紅一藍，被卡喺大樹上。
小女孩好奇地捉住綁住氣球嗰條垂落嘅繩索，氣球就突然掙脫樹枝嘅束縛，帶住小女孩飛上天際，衝破迷雲鎖霧，彷彿要奔向月亮。
小女孩嘅驚慌僅在一剎。
好快，佢飛過田野，飛過羊群，飛過學校，飛過馬路、戲院、商店。
風喺耳邊呼嘯而過，沖走所有悶熱。
連同日常嘅煩悶瑣碎——做唔完嘅功課、無人願意陪佢攀爬嗰座山、不幸病倒去唔到嘅旅行、早兩個月突然離去嘅小貓......通通都喺飛翔嘅過程中被拋諸腦後。
小女孩第一次發現，原來人可以咁自由。
之後小女孩變得更孤僻，唔再在乎無人同佢講嘢。只有每晚嘅飛翔先係佢期待嘅事。
見住女兒日漸一日地自我封閉，父母做咗一個決定：換個環境生活。
小女孩哭過鬧過，都改變唔到父母既想法。
而搬咗之後，佢果然無再遇過會帶佢飛嘅氣球。
隨著時間漸去，佢甚至開始分唔清呢段經歷係夢境或現實。
新城市繁華鼎盛，同小女孩由細到大居住嘅地方完全唔同。
小女孩以為自己會更唔適應，卻意外地喺到搵到興趣。佢愛左上音樂，有咗喜歡嘅歌手。
歌手有一把會說故事嘅聲線，可以帶領人遊歷新奇未知嘅世界，又可以撫平一切不安憂傷。喺佢嘅歌聲中，小女孩同樣感到自由。
亦因為咁，小女孩認識咗一班同樣喺五光十色照不到嘅暗處，背著不被理解嘅過往，被寂寞淹沒，以音樂療傷嘅人。
小女孩終於有朋友。
有一日，長大後嘅小女孩去睇演唱會。
女孩驚訝地發現，台上心愛嘅歌手，手裡捉住一紅一藍兩個氣球，與自己某段記憶重疊。
佢閉上眼，如同小時候一樣，飛過萬家燈火嘅畫面喺眼前重演。
熱淚盈眶之際，朋友搭住佢膀頭，係朦朧暗黑中送上一個微笑。
從何時你也學會不要離群 從何時發覺沒有同伴不行
耳邊傳來嘅歌聲，肩上感受到嘅熱度，眼前安慰嘅笑容，令女孩腦海裡閃過一個念頭：「以愛作牽絆，離群或合群，也是任我行。」
以後，女孩偶爾仍然會感到寂寞，但佢不再害怕。
因為佢知道，氣球只係換咗另一種方式存在——只要音樂響起，隨時會有人陪伴佢翱翔天際。」
Eason，感謝你嘅存在，帶領咁多小男孩小女孩找到彼此，然後喺你嘅歌聲中一同飛翔。
希望你知道，外面風風雨雨，都總有一群喺唔同程度上被你拯救過嘅孩子們會永遠珍惜你。
生日快樂:)
by Egg”
因為陳奕迅，我識左一群有愛谷友。佢地陪我吹、陪我癲、陪我捉波子棋:)
