作為一個「等左林家謙開演唱會兩年，但一開就撞正我出國」既人，我呢一年一直刻意唔去睇Summer Blues既片段（樹林廝殺部分除外）。此等耐性，完全係基於對某個處女座既信任——我直覺知道，Summer Blues會係一篇環環相扣、細針密縷地織出黎既故事。分開睇只會聞其音而不知其深。
終於，係Summer Blues過後既下個暑假，我跟住特倫斯既腳步，重溫屬於佢既夏日歷險。
一直以黎，我都覺得林家謙vocal定位係「說書人」。來去如風，可以瀟灑可以溫柔，但都不久留。即使蕩氣迴腸，說的仍是他人故事。但係Summer blues裡，我第一次驚奇地投入「林家謙」既角度黎睇故事。佢唔再單純係旁觀者，而成為左第一人稱既主角。某種老朋友忍俊不禁既加速、喉頭緊繃而改變既共嗚，終於令我感覺呢首歌既節奏裡有林家謙既脈動。有時不完美會更完美。於是我第一次打從心底因為佢歌聲裡既坦白而落下淚來，有左探究既衝動。
Summer blues呢個故事，可以話無乜大主題。既似一本散文，三三兩兩地將散落既故事紀錄起來；又似一本小說，寫低呢個仲夏既特倫斯鼓起勇氣、背起行囊出走，係旅途中收獲友情和愛。觀眾跟住佢闖進桃花流水、回憶錦瑟華年、遊歷奇幻世界。而將呢段冒險之旅中，各個看似無關既片段串連起來既果條金絲名為友情。所以毫不意外Summer Blues一半篇幅都係他人身影。正正係旅途中遇到既人，賦予故事生命，為故事添上真情實感，令故事閃閃發亮。
「平靜的擁抱怒與哀樂」是修養或只是文人既修辭手法大概莫衷一是。但應該好多人心底仍嚮往能回到孩童時般任意妄為，想喊就喊，想笑就笑，無拘無束。只係生活如帶有壓迫機關既房間，以合群作為禁錮我地既牆，將我地置其中壓縮再壓縮。於是應有既情緒同渴望，都被壓縮到連我地自己都用雞毛蒜皮既日常黎蓋過佢。但從「壞與更壞」到「聽風」，我忽然有一種感覺：或者音樂就係房間上既一扇窗，允許我將對過去既遺憾或回味、對未來既不安或憧憬；對自我既質疑或認同、面對他人既迷茫或思慕——果個平凡渺小卻真實既我——通過佢透口氣再搵返黎。
分明係一個係音樂裡浸潤左咁耐既人，Summer blues仍能令我重新翻開懵懂既第一章，我不得不有感被超渡了；終於放下連搶演唱會飛都無資格，買張專輯仲貼心留左位置，俾我放「不存在的票根」既恨。更妙既係，向來將所有執念用哂黎買演唱會飛，其他事一律是旦求其既我，居然「無為而治」就換到生日編號既Summer Blues。邊個話人生不是處處是際遇呢。
最後我仲搵到一個係屋企睇碟既好處——可以慳返鬧班零識睇show禮儀打卡友果啖氣。
實在係我佛慈悲。（合十）（咩結論）
p.s. 我要再強調我真係無咁鍾意林家謙，我都唔知點解我為左呢條仔，買碟都唔夠仲要買埋blue ray player。不過衝住播碟我都生到一篇，Summer Blues係真心值得推坑（而且仲咁L靚，內外顏值都高到連帶覺得林家謙都靚仔左既靚
