本來唔寫架喇，但今年叱吒睇到著哂火就吹幾句。
2022又係音樂上幾正既一年。前年出色既歌手繼續發熱發光，特別係林家謙。年頭「某種老朋友」一出，我已經覺得今年又無人贏佢。然後佢年中辦埋第一個演唱會，雖然我睇唔到（哭）但人人都讚爆，聲勢又推上一層。年尾仲派多首「記得」，如果唔係Jay Fung神來一筆，出左「給缺席的人唱首歌」卡左第二位，我又要俾人話偏心佢得太過份（雖然而家已經俾人話XD）。
之後講陳蕾。仙女今年只派左兩首歌，但樂迷角度，夠高質一首就夠。「下流社會」仍然係陳蕾拿手既搖滾。本來大家擔心同佢之前歌路類似，結果證明陳蕾又係進化速度同細菌繁殖差不多既歌手，唱功比之前更扎實，於是能支援更多技巧，演繹更放。年尾KKBOX DJ中左搵陳蕾黎頂，練左四日就將人地首歌唱得好十倍，成功引起廣大觀眾注意及支持。機會是留給準備好的人，是金子始終會發光。2023係陳蕾架喇（我地怕買唔到飛到人生第一次join歌迷會XDDDD）。#陳蕾世一！！
要講紅，今年既Serrini應該同陳蕾不相伯仲。Dr. Leung 2022超勤力，派左幾首廣東歌年尾仲出埋國語碟，又搞左唔同既音樂會同event、做嘉賓做MC…睇佢同Ivana個show係見到佢死忠超級多，而且係超岩channel（同好有錢）果種。睇見我愛既歌手都漸漸發光，深感欣慰（？）但音樂上我個人係有點可惜，佢未紅之前既歌每首我都喜歡，紅左之後反而一般。好彩今年「樹木真美」仍然見到佢音樂上既優越。而家不缺文青系女歌手，但唱到呢種澎湃大歌既無乜幾個。
今年做得好好既仲有Jay Fung，唔止我愛既「給缺席的人唱首歌」，仲派左幾首佢拿手既R&B都一樣正。黃妍、泳兒既歌都keep住有質素。黃妍神奇在連續三年都有歌入我top 10，但我對佢本身仍然無興趣...另外要讚下許廷鏗，獨立左之後音樂水準上升好多倍。由唱罐頭情歌既無名氏一躍成為有態度做口碑既歌手。
阿Jer我就會有點擔心。年頭「MM7」成為大家既2022十大，但之後派既歌就睇得出佢仍然幾大局限，handle唔到需要感情既慢歌。即係佢作為一個音樂品牌，仍然係靠別人打造。呢點姜濤就同佢完全相反。阿姜派左幾首歌都證明佢係一個有想法既歌手，最可惜係唱功唔得。於是年尾叱吒俾人鬧爆。呢點我真係覺得好惋惜。佢本來就容易俾人放大，903台上搞到咁更俾哂位人入，講到唱得唔好就代表佢係音樂上同樣一無是處咁。但又否認唔到佢唱功真係...頗有種恨鐵不成鋼既感覺。
帶返去叱吒——以上我講既咁多歌手，得林仔係derserve返佢應攞既獎。Jay Fung既唱作金變銀，泳兒女金變女銀，聲勢最高拎最女既陳蕾404，阿Jer、牙醫、Mami、艾粒直頭查無此人。就連林仔拎既至尊歌都被調包。原因永遠無公開既正確答案就唔提喇。叱吒調獎不嬲都知，只係可摸以做得好睇少少？
但有一件事肯定唔係陰謀論。就係拎最受歡迎女歌手既欣宜，100%係靠神徒投出黎。前年欣宜同AL玩果陣我仲覺得係fans心態，而且佢果期啲歌都仲算值得拎。但上年就頗明顯係為左癡人氣。今日咁岩欣宜紅館公售，得3成放出黎賣，兩個鐘都仲買到4連。最受歡迎？投佢啲人唔買飛？Mirror更加唔使講，今鑊之後路人緣可以話歸零。連我呢個算理性既路人而家都覺得班鏡粉（特別係神徒）真係好撚煩。連帶除左阿Jer同阿姜，見到其他人我都想兜路。捧得高跌得快，班鏡粉再咁落去，應該好快搞死哂佢地主子。
