睇左兩日FULL DAY MUSIC SHOW，好多好多第一次。
第一個純屬香港人香港BAND既音樂節，真係好開心可以參與；
第一次睇大雜匯既MUSIC SHOW遇到一大班從頭HIGH到尾既觀眾，先知香港樂迷都可以咁投入；
第一次見到人玩MOSH PIT嚇到傻 (果陣完全唔知咩事仲以為d人打交)，不過好彩有第一日既經驗，先可以第二日又走唔切係暴風中心仍然冷靜到自己都驚訝；
第一次睇戶外SHOW遇到暴雨；第一次睇BAND睇到想嘔；亦都睇到好多聞名已久但未曾睇過LIVE既BAND。
無論係熾熱既太陽定猛烈既暴雨，大家都仍然堅守。我覺得呢兩日我見證左什麼是青春。
P.S. 青春的代價是第二日以一個鬼都嚇親既殘樣返工...同事們可以唔好再問我做咩咁殘-__-
Blaster
我發覺我真係佢地fans…其實講曲詞又好，主唱又好，Blaster既關注度真係遠遠被低估。而當現場乜類型既樂迷都有既時候，我好認真地諗點解佢地仍然咁被漠視... 最大路既情歌佢地唔唱，獨立音樂最鍾意既神經氣質無，小清新絕對唔係，話ROCK又爭D，甚至連勵志路線都唔行！或者可以算係POP住咁寫社會議題？其實佢地曲真心寫得好，寫詞都睇得出有SENSE，要整首會紅既情歌應該唔難... 反正佢地唱咁早好可惜，值得俾多D人睇到！
Heyo
開始仲以為係我喜歡果隊街頭Band…不過呢個Heyo都出乎意料地正。
新青年理髮廳
老老豆豆我真係唔知佢地咁紅。雖然睇得出今次黎宣傳新碟，但個rundown都幾有誠意。我喜歡佢地D歌詞，不過仍然覺得發仔講野好聽過唱歌；而要唱的話live好聽過CD。(即係佢地可唔可以入STUDIO執下D音呢) btw 串足全場既阿俊到底係邊位？同埋明明上首歌話買日出康城，做咩下首住左係北角？
Killersoap
我喜歡佢地，主唱好唱得.... 唔，無咩特別感想。
Dear Jane
我有段時間幾排斥聽Dear Jane，因為覺得佢地主唱既音準不是很好... 現場只係加深左我印象，唱「無可避免」由頭到尾都唔岩key...但唔否認佢地d歌好聽，同埋佢地真係好紅。現場勁火熱！
Nowhere Boys
值得關注。睇唔出係新band，無論係音樂、控場能力定樂手既外型 (喂)。我KK入面有首佢地feat Heyo既歌，係今日之前我仲以為係舊歌
King Ly Chee
(戴頭盔) 我個人係完全唔識欣賞Heavy Metal… 一開始d人係到玩MOSH我真係嚇到傻 (果陣完全不知道佢地做咩)。聽聽下仲超唔舒服好想嘔，唔知係因為超重超大聲既音樂、直射到我眼盲既閃爍燈光、不斷碰撞將其他人迫去外圍既樂迷、現場既煙味，定主唱不斷重覆既無意義粗口。但明明我平時1D都唔腐泳 (或黃翠如) 囉！btw我聽完返黎仲耳鳴！！
Supper Moment
今日之前我仲問緊Supper定Rubber紅d。但未出場已經開始人迫人既程度，齋播CD已經全場大合唱 (兩日來唯一一隊出現呢件事)，都令我都覺得自己問緊廢話。至少係呢場SHOW黎睇係廢話。不過Supper真係我見過最勤力最用心既香港樂隊。雖然佢地唔會講，但每次聽佢地，都有種佢地當每次表演係最後一次咁唱既感覺，無論個場幾細，觀眾幾少都好。最難得係佢地有熱誠同熱血既同時，仍然保有屬於香港人既傲骨。真係收到哂，11月紅館見！(我買到飛的話)
Rubber Band
好神奇地Supper一走人群就散。隔離走既人話，RubberBand唔使咁近睇喎 (why?)。第一次睇佢地，衝口而出既竟然係佢地好有腰身。(其實主要針對阿正) 初見面就好想頒個樂團靚聲獎俾6號。聲底醇厚渾圓，共鳴強，中氣足，低音、轉音都好靚。high high下都忍唔住停低認真聽佢把聲。睇Band Show我好少俾主唱把聲吸引到呢個地步，對上有印象係阿軒 (Blaster)，但都只係有一刻感嘆佢唱得好。6號把聲係完全攝魂！係咪識唱歌既都去哂夾Band？呢班主唱真係可以打贏某d拎男歌手獎既人... RubberBand做壓軸都好適合。炎熱既夏夜，同一大班香港樂迷大合唱發現號、阿波羅、小涼拌等等廣東歌，有種久久不散既感動！
Zolar Wing
Sorry無咩印象...
李拾壹
完全係諧星！同新．沐浴巨星 HOCC同LV，難怪咁多合作！李拾壹唔係第一次睇，但以前睇都係串下場，唱一兩首咁，無咩TALKING。今日一會，覺得佢開LIVE SHOW的話應該會變棟篤笑之類...不過佢D歌本身都GAG GAG地，真人係咁好似又唔出奇。唔止寫歌唱歌，控場同互動都好厲害。好期待再睇到佢！btw 「雞，全部都係雞」到底是什麼？？
Kolor
有一種歌同人唔多MATCH既感覺。見到人覺得好硬橋硬馬，應該係唱HEAVY METAL，但結果係會唱情歌既ROCK BAND。然後時差真係幾好聽，前幾日先聽到我D媽咪級同事鈴聲係呢首。
雞蛋蒸肉餅
雪姐話，我地難得係佢地未篡起前已經睇佢地LIVE，而且印象深刻。我覺得雞蛋蒸肉餅既歌係要現場聽的，同CD係兩回事。
秋紅
同樣係Heavy Metal，同樣一埋人衝出黎MOSH，秋紅俾我既感覺就好太多。雖然雪姐話係未入夜，D人未食大麻所以無咁癲... 但可以feel到人地D粗口就用得恰到好處，會覺得爽而唔係反胃！雖然仍然唔識欣賞，但起碼我下次見到佢地唔會避！
Yellow 野佬
今日完全係衝住佢地黎。秋紅一完，本來被迫到去後面既兩個麻甩fans就用最靈巧既步伐鼠返上去，霸返個第二排黎撐Yellow。今日歌單基本上都係HIGH歌，有著襪浸溫泉、上面話OK、麻不甩、鬼叫我窮牙，而且終於睇到上次因大雨中斷既跟車太貼！然後我今日先知Yellow最咸濕既歌，原來唔係夫目前飯或者著襪浸溫泉，而係時間靜止器！(睇歌名岩既) 可能真係太期待，覺得佢地唱得好短。幾時先可以睇到一場Yellow既full concert，唔使周圍撲佢地出SHOW？
假音人
對於假音人，我不認識，但事前係網上見到有人大呼驚喜。主唱把聲有種八十年代既feel，雪姐形容得精準，就係似羅文。佢地既歌有種矛盾既感覺，我甚至唔識用文字講出黎。我以為自己唔喜歡呢類型既音樂，但聽聽下又覺得幾過癮。一首「甚麼是青春」在是晚如此貼題。或者我之後都係唔會聽佢地既歌，但今日過後，我起碼會記住呢首歌。
觸執毛
暴雨既時候輪到一隊咁HIGH既BAND真係好ROCK好青春。講起呢場表演，我腦海中只有大家揮灑住雨水、係音樂籠罩下用盡力舞動既畫面...
LMF
講到粗口用得最好，首選當然係LMF。差不多每句都有粗口，但言之有物，鬧得合理，只會更將情緒頂上去而唔係厭惡。(我對早一日既怨氣深到呢XD) 當年既LMF真係好厲害，係罐頭情歌當道既年代，仍然以一首大懶堂唱到街之巷聞。今次第一次會佢地，果然係名不虛傳。雖然我真係只識大懶堂，但仍然HIGH到癲！佢地話本來都無打算唱，係encore既力量太大！無論作為星期日既晚上既ENDING，定一個本地音樂節既ENDING，呢首歌都係完美之選。
私心想睇但無係名單出現：
After10
覺得佢地值得佔一席。都見到佢地主唱出現 (我地竟然認得)
Empty
我吉他阿sir隊band。應該係有點知名度既樂隊？最近見佢地出新歌，但出親都係收費或非公眾既show，實在好好奇
嘿唷
睇一次就念念不忘，我就係喜歡佢地！
突然覺得好多BAND名收埋左個 “ER”，易改D？
SUPPER/ RUBBER/ BLASTER/ MISTER (MR)/ KILLER/ AFTER
